[toooooooo long] 關於見家長..
話說尋日係港女爸既壽辰
於是我就捉埋麥仔一齊去參加十幾人既晚餐
（麥仔見過家長，但未見過我既親戚）
於是前幾日我已經開始有啲既期待又緊張
結果～交際花麥仔當然輕鬆應對各位來賓
對我對佢對我既家人都算過左個幾愉快既晚上。
然後我就諗番起我第一次見家長既經歷..
我同麥仔都係從未帶過其他異性番屋企
我地各自既第一次都係發生喺一齊左一年之後..
而我去見麥爸麥媽果次，仲要係不知情之下！
話說果日係麥仔既生日，佢話要同家人食晚餐
我地當時係同事，放工時候佢叫我陪佢去整啲野
我就不虞有詐陪佢去啦～
去既中途我就講笑話：做咩唔帶埋我同您屋企人食飯呀？定係您整完野之後會同我去？
麥仔笑而不語...
走著走著，突然去到一間餐廳前停下
麥仔就話：入去啦。
果刻我就知道大獲了！我講下笑咋我講下笑咋
我果刻係甘話唔好啦痴線咖甘突然下次先啦
然後一方面就畀麥仔拖左我入去餐廳..
果刻我淨係心諗：搞錯我未化好妝未著靚啲呀...
重點是：原來麥爸麥媽都唔知道會有我既出現
又或者應該話，佢地都唔知個仔拍緊拖。
而喺毫無準備同非常緊張既情況下
我自我介紹仲話hi auntie,uncle我係麥仔同事呀...
噢諗番我真係表現得好愚蠢。
全餐飯我應該都無放鬆過
個心不停諗好多野但又唔知諗緊咩野
都好似無咩出聲無咩食野
總之就係一個笨蛋坐左喺到.....
不過有樣野我最記得
最記得坐我對面既麥媽 食食下野目不轉睛望住我
果一刻既笑容我好難忘
大概唔係鍾唔鍾意我，
而係個仔終於帶左個女朋友畀佢睇既喜悅。
後記：我事後不停鬧鬼麥仔做咩唔講聲
然後麥仔話：甘先好玩嘛！講左您地事前又會諗好多野..bilibalalala
雖然口裡鬧佢，但係佢帶我見家長其實都好開心。
完。
Search